भक्तपुरको सूर्यविनायक नगरपालिकाले घरपालुवा कुकुरको व्यवस्थापनका लागि नयाँ मापदण्ड लागू गर्दै अनिवार्य दर्ता, रेबिजसहित नियमित खोप, बाहिर लैजाँदा पट्टा प्रयोग तथा सार्वजनिक पार्क र खुला स्थानमा दिसापिसाब गराउन रोक लगाएको छ। नगरपालिकाले नियम उल्लङ्घन गर्ने व्यक्ति विरुद्ध मुलुकी अपराध संहिता, २०७४ अनुसार कैद वा जरिवानासहित कानुनी कारबाही हुन सक्ने चेतावनी दिएको छ।
बढ्दो अव्यवस्थित कुकुर पालन, सार्वजनिक सरसफाइ र नागरिक सुरक्षाको चुनौतीलाई ध्यानमा राख्दै नगरपालिकाले लिएको यो कदमलाई स्थानीयवासीले सकारात्मक रूपमा लिएका छन्। यसले जिम्मेवार घरपालुवा जनावर पालनको संस्कृतिलाई समेत प्रोत्साहन गर्ने अपेक्षा गरिएको छ।
