काठमाडौँ । प्रधानमन्त्री सुशीला कार्की र राष्ट्रिय स्वतन्त्र पार्टी (रास्वपा) का सभापति रवि लामिछानेबिच भेटवार्ता भएको छ । प्रधानमन्त्रीको सरकारी निवास बालुवाटारमा आइतबार साँझ उनीहरूबिच भेटवार्ता भएको हो ।
भेटवार्तामा मुलुकको समसामयिक राजनीतिक अवस्था, सरकारको प्राथमिकता, सुशासन, आर्थिक सुधार तथा समावेशी राजनीतिक अभ्यासका विषयमा छलफल भएको बताइएको छ । पछिल्लो समय विकसित राजनीतिक घटनाक्रम, संसद्को भूमिका र सरकार–प्रतिपक्षबीचको सहकार्यका सम्भावनाबारे पनि कुराकानी भएको स्रोतले जनाएको छ ।
भेटमा सञ्चार तथा सूचना प्रविधिमन्त्री जगदीश खरेल, रास्वपाका उपसभापति डा. स्वर्णीम वाग्ले तथा महामन्त्री कविन्द्र बुर्लाकोटी समेत सहभागी थिए । छलफलका क्रममा प्रधानमन्त्री कार्कीले राजनीतिक स्थिरता, जनविश्वास अभिवृद्धि र संस्थागत सुधारमा सबै दलको सहयोग आवश्यक रहेको धारणा राखेकी थिइन् ।
भेटवार्तालाई सौहार्दपूर्ण र सकारात्मक बताइएको छ । औपचारिक सहमति वा निर्णय सार्वजनिक नगरिए पनि आगामी दिनमा संवाद र सहकार्यलाई निरन्तरता दिने संकेतका रूपमा यस भेटलाई हेरिएको छ ।
